Endurreisn Tindfjallaskála

Reisugill skálans

2009-08-06T13:29:00.000-07:00

Til stendur að flytja "nýja" skálann upp í Tindfjöll helgina 15.-16. ágúst. Að því tilefni er félögum í Ísalp boðið að koma við og skoða skálann, fá sér hressingu, rifja upp gamla tíma eða láta sig dreyma um ævintýraferðir í Tindfjöll á vetri komandi.

Stjórnin grillar pulsur og býður upp á bjór og gos.

Skálinn stendur á planinu á Kirkjusandi, þar sem endurbyggingin hefur farið fram.

Veislan hefst kl 20:00 á þriðjudagskvöldið 11.ágúst og við skorum á sem flesta að láta sjá sig

Vika í flutning

2009-08-06T01:45:00.000-07:00

Jæja þá er þetta að klárast.

Nú vantar í raun bara strompinn og reykrörið og þá er skálinn klár til flutnings.

Planið er að henda þessu í um helgina og prufukeyra kamínu og reykrör. Það má því búast við því að skálinn verði klár til flutnings á tíma.

Lokafrágangur

2009-07-23T14:05:00.001-07:00

Þó lítið sé bloggað þessa dagana er hins vegar allt á fullu í skálanum. Við nálgumst óðfluga lok verkefnisins en stærstu atriðin sem er verið að klára þessa dagana er reykrörið úr skálanum og eldhúsáhöld. Læt fylgja með nokkrar myndir sem sýna hversu gríðarlega flottur skálinn er orðinn.

Eins og sést er allt klárt að utanverðu fyrir utan einn glugga. Eins er búið að græja stálgrind sem skálinn situr á og mun einfalda flutninginn ansi mikið.

Eldhúskrókurinn er klár en diskar og glös eru á leiðinni

Kojurnar voru endursmíðaðar í sömu mynd og áður.

Stemning á vinnukvöldi!

2009-07-23T14:03:00.000-07:00

Gamli skálinn

2009-07-03T01:02:00.001-07:00

Þessar myndir eru að finna í bókinni Fjallamenn. Sýnir skálann eins og hann var upprunalega.

Glerið í

2009-07-01T01:52:00.000-07:00

Í gær var mikið fjölmenni mætt til smíða og mikið gekk á.

Glerið er komið í skálann fyrir utan stafninn.

Eldhúskrókur er svo gott sem tilbúinn

Kojurnar eru komnar upp.

Millihurðin er tilbúin

Það fer því að minnka allverulega verkefnin sem eru eftir.

Vinnuferð í Tindfjöll

2009-06-30T02:09:00.000-07:00

Fjölmennt var upp í Tindfjöll um helgina þar sem unnið var við grunn skálans. Slétt var úr fletinum sem skálinn sest ofan á og mikið af grjóti var flutt að staðnum sem verður svo notað til að hlaða að skálanum í ágúst. Þvílík rjómablíða var uppfrá og ekki oft sem það blæs ekki á þessum stað.

Ekki slæmt veðrið sem hópurinn fékk. Við þökkum Miðdalsmönnum kærlega fyrir afnot af skálanum

Hlynur Sk sýnir ljósmyndara hvernig akkerin sem verða fest við grindina virka.

Ungmennafélagsandinn var gríðarlegur

Nafnarnir Hlynur og Hlynur slétta eins og enginn væri morgundagurinn

Kojur og eldhúskrókur

2009-06-26T01:16:00.000-07:00

Vinna við kojur og eldhúskrók fór af stað á þriðjudaginn. Skálinn er svo gott sem tilbúinn að utan og er fókusinn kominn á það sem upp á vantar innandyra. Mikið er pælt í kyndingarmálum þessa dagana en valið stendur á milli olíukyndingar og hefðbuundnar viðarkabyssu.

Um helgina er svo planið að undirbúa undirstöður skálans í Tindfjöllum og er búið að stefna fjölda manns þangað.

Endurgerð að klárast!!!

2009-06-18T15:42:00.000-07:00

Við höfum verið heldur latir að uppfæra síðuna undanfarið en það er engan veginn vegna þess að lítið hefur verið að gerast. Þvert á móti hefur verið smíðað og smíðað og eins og sést á myndinni þá er skálinn að klárast. Hver hefði trúað því!

Guttormur hefur stjórnað verkinu eins og herforingi og eytt miklum tíma niðrá Kirkjusandi.

Hann mun væntanlega ljúka smíðinni utanhús á morgun.

Reyndar er sitthvað smálegt eftir og það mun vonandi klárast áður en skálinn fer aftur upp til fjalla um miðjan ágúst.

Gluggar

2009-05-14T12:37:00.000-07:00

Fyrstu gluggarnir fóru í skálann í dag, sjá myndir

13.maí

2009-05-14T01:04:00.000-07:00

Unnið hefur verið áfram síðustu daga og mikið áunnist.

-Búið er að klæða alla útveggi með panel
-Búið er að klæða forstofu með panel
-Þakið er klárt,þ.e. síðasta platan komin á og búið að undirbúa mæninn
-Vinnupallar voru rifnir í gær
-Loftið á forstofunni var klætt með panel
-Búið er að einangra loftið

Framundan er að klæða loftið með panel og henda gluggunum í en þeir eru komnir í hús
Svo fer að styttast í að nýjar kojur verði smíðaðar og skálinn verði klæddur að utan

Gutti að leggja lokahönd á panelinn á loftinu

Hér sést hvernig forstofan er farin að líta út

Orðið aðeins hreinlegra í kringum skálann eftir að vinnupallarnir voru rifnir. Nú sést betur upprunalegt útlit skálans.

Góður vinnudagur í gær

2009-05-11T01:16:00.000-07:00

Á laugardag voru Guttormur og Árni mættir fyrir allar aldir ásamt félaga Árna. Þeir klæddu með panel af miklu kappi ásamt því að tvöfalda kraftsperrurnar (skammbitana) í loftinu. Nú hafa þeir lokið við að klæða alla veggi skálans fyrir utan forstofuna og gaflinn á svefnloftinu. Einnig hafa þeir lokið við að endurnýja grindarbita í kringum stóra gluggann á gaflinum en þeir reyndust frekar fúnir þegar glugginn var tekinn úr. Eftir hádegi bættust Kristján Guðni og Hlynur við eftir að hafa keypt ull og notuðu hana til að einangra loftið í skálanum. Næst er að halda áfram að klára að klæða forstofuna með panel og svo bíður loftið eftir sömu meðferð.

Panell á veggi

2009-05-07T14:24:00.000-07:00

Í dag var smíðað áfram og nú er panellinn kominn á hluta skálans. Sjá myndir

Skálinn einangraður

2009-05-06T15:07:00.001-07:00

Vinna hélt áfram í gærdag og gærkvöldi og nú er staðan þannig að gólfið er klárt og verið er að einangra útveggi skálans.

Vinnan heldur áfram

2009-05-06T02:39:00.000-07:00

Í síðustu viku var unnið tvö kvöld.
Á þriðjudaginn var farið í öflun aðfanga eftir að hafa leitað tilboða og reynt að sníkja efni eftir fremsta megni. Við keyptum mikið af efni, gólffjalir, einangrun, girði, plast og fleira sem unnið verður úr á næstu vinnukvöldum. Hallgrímur samdi um efnið og á hann þakkir skilið fyrir það og einnig Valli sem lánaði stóran sendibíl í flutningana. Guttormur fór til verkstæðisins sem smíðar gluggana og þeir eru klárir nema hvað að hann bað þá um að járna gluggana líka. Eftir efniskaup og sendiferðir var hafist handa við gólfið. Borðin sem höfðu verið negld ofan á bitana til bráðabirgða voru fjarlægð og rusl og drasl hreinsað þaðan sem einangrunin á að fara. Einnig útbjuggum við festingar á alla gólfbita úr þykku girði sem notaðar verða til að festa skálann niður á undirlagið sitt eftir flutning.
Á fimmtudaginn var haldið áfram með vinnu við gólfið. Botninn var þéttur (þ.e. klæðningin sem einangrunin kemur ofan á) þannig að raki komist út en mjög takmarkað ætti að geta skafið inn í einangrunina. Næst var einangrun sett í allt gólfið. Þegar því var lokið var hafist handa við að leggja gólffjalirnar sem eru 20 mm þykkar og 90 mm breiðar og koma ýmist í 3,6 eða 4,2 metra lengd. Fjalirnar eru með tappa og nót og eru lagðar svipað og parket en eru þar að auki negldar í gegnum tappann þannig að naglarnir sjást ekki. Ágætlega gekk með gólfið og náðist að leggja frá vegg og fram í hurð.

Loksins Loksins

2009-03-05T23:25:00.000-08:00

Jæja þá er vinnan við skálann aftur komin af stað eftir langa og góða pásu. Í gærkvöldi var þakið klætt með bárujárni og klárast sú vinna eftir helgi. Næst er svo að henda nýjum gluggum í og klæða restina af skálanum með bárujárni. Við gætum reyndar þurft að bíða aðeins því gluggarnir eru enn í smíðum.

Svar hefur loksins fengist frá Húsafriðunarnefnd um styrk en þar var ekkert að fá þetta árið. Við gerðum okkur miklar vonir um þann styrk og því setur þetta öll okkar plön um að klára skálann í uppnám.
Hugmyndin er því að leita á náðir félaga Íslenska Alpaklúbbsins um framlög til endurgerðarinnar svo hægt verði að klára skálann í sumar. Meiri upplýsingar um það koma innan skamms
Að neðan eru myndir frá gærkvöldinu

Annáll

2008-12-21T08:50:00.000-08:00

Guttormur tók saman stuttan annál yfir það sem hefur verið gert í haust. Hér kemur hann

Stiklað á stóru:

Auðvitað hefur þetta verið meiri vinna en flestir áttu von á. Við höfum meðal annars reist vinnupallar allan hringinn. Naglhreinsað pallaefni sem við fengum gefið og lánað hjá ÍAV.

Endlaust verið að rífa og henda út fúafjölum. Henda því í ruslagám, og enn er allt gamla járnið eftir og meira til.

Ég hef farið nokkrar ferði í Húsasmiðjuna. Hef valið efnið í skálann, feita og fallaega furu.

Þá hefur Björn Marteinsson verkfræðingur haft áhuga á þessu verkefni og gefið góð ráð, eins Jon Nordstein arkitekt, en hann starfar fyrir húsafriðunarnefnd.

Mikil og góð vinna var lögð í umsökn til Húsafriðunar og mynjaverndar. Margar fleiri umsóknir hafa verið sendar út en tíðin er ekki góð.

Bárujárnið er í pöntun hjá Blikksmiðju Gylfa. Ég læt flytja það niðureftir og kom því inn í hús, kanski strætó þvottahúsið ?

Næsta verkefni er þannig að negla járnið á þakið og ganga frá kilinum og strompinum. Það gerum við á nýju ári

því ég reikna með að margir séu uppteknir í sínum björgunar og hjálparsveitum næstu daga.

Ég reiknaði ekki með að burðarviðirnir væru svona illa farnir. Hér er samantekt á ástandinu og því sem lokið er:

Allir gólfbitar utan einn hafa verið endurnýjaðir. 2X6

Fótstykkin voru öll ónýt. Enurnýjuð með gagnvarinni furu 4x4

Veggjastoðir sunnan megin voru ónýtar, Endurnýjaðar 4x4

Veggjastoðir hálf ónýtar norðanmegin. Endurnýjað og laskað saman

Sylla á suður hlið ónýt. Endurnýjuð 4x4

Klæðning á hliðum skálans var nánast engin, en ónnýt samt. Endurnýjað og heilklætt með 1x 6

Klæðning á norðurgafli var í þokkalegu standi, stendur mest óhreyfð

Þakklæðning var fúin, aðeins nokkrir sæmilegir blettir. Allt endurnýjað 1x6

Allar sperrur voru fúnar, ýmist í mæninn eða einhverstaðar annarstaðar, aðeins ein sperra við norðurgaflinn er heil.

Hornstoðir heilar, nema norð-vestur, semn var fúin í neðri endann. Gert við með oregon pine

Forstofan og framhluti skálans allur ónýtur, Endursmíðað

Gólfið á svefnloftinu fúið út við gluggann. Endurnýjað og stúfað saman á fyrsta loftbita.

Gólfið í skálanum ónýtt á nokkrum stöðum, allt rifið burtu. Verður endurnýjað.

Panill rifinn úr skálanum. meira og minna skemmdur og víða fúinn bak við neðri kojurnar, Við höfum hirt koparnaglana og heillegar fjalir úr súðinni. Óvíst um hvort þetta nýtist nokkuð.

Eldhús innréttingin öll ósköp léleg. Farin.

Gluggar og hurðir verður að endurnýja. Er að leita eftir tilboði hjá Trésmíðaverkstæði Jóns og Salvars.

Pappi kominn á

2008-12-21T08:34:00.000-08:00

Jæja þá er vinnunni lokið þetta haustið og menn komnir í jólafrí. Við byrjum aftur strax eftir jól. Staðan er þannig að á föstudagskvöldið kláraðist vinnan við að klæða pappann á og því er það næst að koma bárujárni á þakið.

Einnig hélt hópurinn jólaglögg á um kvöldið og myndaðist gríðarleg stemning og fjöldi manns lagði leið sína í Kirkjusandinn

Hallgrímur sá um að halda í skálastemninguna og kom með reykt læri handa mönnum

Gríðarleg stemning í húsinu og erþað mál manna að þetta hafi verið eitt af betri og fjölmennari partýjum sem hafa verið haldin í skálanum síðustu ár...
Hópurinn ákvað að heiðra yfirsmið Guttorm fyrir alla vinnuna sem hann hefur lagt á sig í haust. Kunnum við honum miklar þakkir fyrir
Steppó og Hálfdán sáu um veitingarnar en heitt kakó var á staðnum og grillaðar voru pulsur ofan í mannskapinn
Pappinn að komast á þakið
.

Skálanum lokað

2008-12-14T10:10:00.000-08:00

Þakið var endanlega klárað í gær og byrjað á pappanum. Nú er rífandi gangur í hlutunum og næst á dagskrá er að henda bárunni á .
Við auglýsum því eftir smiðum sem eru vanir að vinna með bárujárn til að hjálpa okkur að klæða skálann

Hér má sjá nýja þakið en við enduðum á því að rífa allt í spað og skildum tvær sperrur eftir af því gömlu .

Myndir 6.des

2008-12-06T11:11:00.000-08:00

Vinna við nýjar sperrur kláruðust í dag og því er næst á dagskrá að klæða þakið

Myndir 4.des

2008-12-05T09:11:00.000-08:00

Vinna við þakið er langt komin og búið að endurnýja flestar sperrurnar auk þess sem þær verða mun fleiri en áður

Nýjar myndir

2008-11-30T09:58:00.000-08:00

Nú er búið að rífa þakið af eins og sést að neðan. Við vorum að vonast til þess að ekki þyrfti að rífa af nema pappa og báru en svo var ekki. Timbrið var illa farið og því tekin ákvörðun um að skipta því út . Þá kom í ljós að sperrurnar eru einnig í lélegu ásigkomulagi og því verður gert við þær og bætt við fleiri sperrum á húsið til að styrkja það frekar.

og vinnan heldur áfram...

2008-11-24T02:39:00.000-08:00

Verkið mjakast áfram og nú erum við að byrja á þakinu. Búið er að rífa allt innan úr skálanum, þ.e. kojurnar, innréttinguna og allur panell er farinn úr bæði veggjum og lofti. búið er að klæða allan skálann að utan og andyri hefur verið endursmíðað. Nú er verið að reisa vinnupalla kringum skálann svo hægt sé að ganga í þakið.
Stefnt er að því að fara langt með viðgerð á þakinu fyrir jól

Skipt var um flesta þverbita undir skálanum og gólfklæðning rifin af. Hér sést nýtt gólf sem hefur verið byrjað á

Anddyrið var endursmíðað frá grunni

Öll klæðning var rifin að innan svo hægt sé að einangra skálann

2008-10-19T07:59:00.000-07:00

Þá er viðgerð á grind lokið og byrjuðum við að klæða skálann aftur í dag. Eins og sjá má þá er forstofan farin, en hún var ónýt . Verið er að smíða nýja forstofu og það fer væntanlega langt í næstu viku

Hér sést framhliðin á skálanum ...var svo illa fúin að við þurfum að smíða hana frá grunni
Hér má sjá hliðina sem við kláruðum að klæða í

Viðgerð grindar að ljúka

2008-10-14T01:42:00.000-07:00

Mikið hefur gerst undanfarið og menn láta krepputal ekki hafa áhrif á sig! Viðgerð á grindinni er langt komin en það hefur verið skipt um nánast alla burðargrindina . Næst er að klára grindina á inngangnum en svo verður farið í að klæða skálann aftur og henda nýjum gluggum á.

2008-09-30T14:35:00.000-07:00

Það var í styttri kantinum vinnukvöldið í kvöld en þó komumst við e-ð áfram. Hlynur og Gutti fóru í dag og keyptu fyrsta efnið í skálann og nú ættum við að eiga nóg efni í viðgerð á grindinni. Við komumst að því áðan að þverbitarnir undir skálanum eru nokkrir í mjög vafasömu ástandi og því þarf að skipta þeim út.

Hér má sjá að búið er að fjarlægja langbitann en hann var ónýtur. Nokkrir af þverbitunum eru svo fúnir í endann og því þarf að saga af þeim og styrkja .
Gólfið í forstofunni hrundi þegar stífurnar voru fjarlægðar....framhliðin á skálanum hangir svo í lausu lofti. Merkilegt að þessi skáli skuli hafa þolað öll þessi ár uppfrá

Niðurrif

2008-09-27T13:13:00.000-07:00

Vinnu við niðurrif var haldið áfram í dag og kom ýmislegt í ljós eins og sjá má á myndunum að neðan. Tvær hliðar skálans virðast vera ónýtar þ.e. timbrið er það fúið að skipta þarf um að öllu leyti . Guttormur yfirsmiður mun skoða þetta með okkur á næstu dögum og meta hvað skal gert. Hinar hliðarnar virðast vera í mun betra ásigkomulagi og lítið þarf að gera þar. Látum myndirnar tala sínu máli

Svona leit skálinn út eftir daginn. Báran,pappinn og masonít plöturnar farnar af en endahliðin var látin halda sér þar sem ástandið er mjög gott

Svona leit einn af burðarbitunum út. Fúinn í gegn og þarf greinilega að skipta honum út
Hlynur og Steppó rífa framhliðina af

2008-09-26T01:31:00.000-07:00

Við mættum 4 í gærkvöldi til að byrja að rífa. Fórum langt með að fjarlægja báruna af útveggjum skálans en sú vinna mun halda áfram um helgina. Við gerum svo ráð fyrir að byrja að klæða í næstu viku...sjá myndir

Hér má sjá upprunalegt form skálans eftir að ruslakompan var fjarlægð

Smíðin að hefjast

2008-09-25T09:17:00.000-07:00

Í kvöld mun smíðin formlega hefjast en síðustu vikur hafa farið í frekari undirbúning eins og styrkjamál og húsnæðismál. Ætlunin var að koma skálanum inn í skemmu en það klikkaði svo á síðustu stundu. Það er því ljós að við verðum á Kirkjusandinum.

Í kvöld og næstu daga er ætlunin af rífa klæðninguna af skálanum og sjá hvernig ástand grindarinnar er í raun og veru.

Myndir frá vinnukvöldinu væntanlegar á morgun.

Þeir sem vilja koma að smíðinni endilega hafið samband við einhvern af okkur í hópnum.
Ekki verra ef viðkomandi er iðnaðarmaður því hlutfall verkfræðinga er fullhátt !

Skálinn kominn

2008-09-02T01:38:00.000-07:00

Allt gekk vel í gærkvöldi og skálinn er kominn á nýja heimilið sitt. Jóhannes Rögnvalds tók að sér að skutla skálanum upp á pall og rúnta með hann niður eftir. Kærar þakkir fyrir það

Á morgun eigum við svo von á stálbitum sem skálinn verður hífður upp á en þegar það verk er búið er ekkert sem kemur í veg fyrir það að framkvæmdir geti hafist.

Þeir sem vilja koma að smíðavinnunni setji sig í samband við einhvern úr hópnum.

Flutningur á Kirkjusand

2008-09-01T15:24:00.001-07:00

Seint í kvöld munu nafnarnir Hlynur Skagfjörð og Hlynur Stefánss flytja skálann úr Mosfellsbænum niður á Kirkjusand. Þar mun hann standa næsta árið meðan á viðgerðum stendur.

Þeir hjá Reykjavíkurborg gerðust semsagt svo góðir að leyfa okkur að geyma skálann á gömlu strætó lóðinni næstu 12 mánuðina.

Stefnt er svo að því að hefja smíðina í næstu viku

Fyrsti póstur

2008-09-01T15:04:00.000-07:00

Hér munu birtast fréttir og myndir af endurgerð skálans